Leġġendi Urbani

Tikħila mhux mn'alla

2005-03-21T03:42:00.000-08:00

M'ilux wisq ħbieb tiegħi li spiċċjat bla xogħol. Ġola ddejqet mhux ftit, u jien ukoll, avolja kien żmien l-insib, għaraft li kelli nagħmel xi ħaġa biex naqla x'niekol. Hekk ukoll kien ġralu ħija Klement, iżda dan, li qatt ma kellu nitfa kwiet f'ġismu, dejjem jara kif ħa jdawwar lira. Jixxiegħel bla heda - daqqa jsuq it-trakkijiet fil-barrieri, daqqa jbajjad, daqqa jqiegħed il-madum....

Għalhekk, (avolja kien żmien l-insib), ċempilt lil ħija u staqsejtu għandux xi biċċa xogħol għalija. Iva qalli - kien qed ikaħħal il-faċċata tal-Preluna u ma kinux se jlaħħqu bix-xogħol li kellhom. Għalhekk l-għada kellu jgħaddi għalija biex nagħmlu ġurnata tikħil.

Wasalna tas-Sliema xi s-sebgħa ta' filgħodu (avolja kien żmien l-insib) u waqt li ħija rama l-fallakki bil-ħbula, jien lestejt it-taħlita. Tlajna fuq il-bejt bil-barmil u l-għodda u ddendilna - hu jagħmel naħa u jien nagħmel l-oħra.....

Wara ftit il-fallakka qisha strieħet ftit fuq il-ħbula, u jiena w Klement ħarisna lejn xulxin b'par għajnejn qishom plattini.....ersaqna lejn xulxin biex nerġgħu nitilgħu norbtu sewwa l-fallakka, iżda fis-siegħa u l-mument li ċċaqlaqna iċedi l-ħabel tan-naħa tal-lemin. Bdejna neżlin, iżda ġietni idea....

Jew issa jew qatt - għidt bejni w'bejn ruħi. B'id waħda ħtaft lil Klement mill-flokk u bl-oħra daħħalt il-kazzola li kelli f'idi bejn il-fili. Ħadt skoss tal-beati, imma idi żammet. Il-kazzola wkoll....

Ma damux ma niżżlulna ħabel minn fuq il-bejt u nżilna miegħu - u b'hekk kollox għadda b'wiċċ il-ġid....

Żgur sinjal m'għand Alla l-ħanin - ma jridnix naħdem għidt.....għalhekk l-għada armajt x-xbieki u tlaqt lejn l-Aħrax nonsob.....

L-Għawma

2005-03-18T01:53:00.000-08:00

....din żgur m'għitdhielkomx ħbieb.....

is-sajf li għadda nżilt nogħdos għall-qarnit, u l-baħar kien kemmxejn imdardar għax lejliet kien il-maltemp. Ngħum u ngħum u xi kultant nitla' fil-wiċċ biex nieħu n-nifs...bilkemm ma stħajjiltnix baliena. Fl-aħħar bdiet dieħla l-għeja, imma meta tlajt fil-wiċċ biex nara sewwa sew fejn qiegħed, ma stajtx nara art....

Għalhekk għaddast rasi u bqajt naqdef kemm niflaħ u sa fl-aħħar wasalt. Għaddieli minn moħħi li forsi Ġola kienet bdiet titħasseb għaliex iddawwart daqshekk. Ma għaraftx fejn kont - u mix-xemx stajt nara li kien tard wara nofs in-nhar. Iżda qtajtha li nistaqsi 'l-wieħed mis-sajjieda max-xatt x'ħin sar - għax ġietni kurżita nara kemm kont ili ngħum. Ngħidilkom is-sewwa wiċċi ma bqajtx inħossu bil-maskra tagħfas fuqu.

Qrobt lejn dat-tali u staqsejtu:

- "sieħbi ma tgħidlix waħda x'ħin hu hux?"

Dan baqa jħares lejja qisu ċċassat - għalhekk erġajt staqsejtu....

- "Ma chevvuo' cumpa?"

qisu taljan da....forsi xi turist?

għalhekk mort fuq wieħed li mid-dehra kien qed jagħmel il-gambli għas-sajda ta' bil-lejl.

"taf tgħidli x'ħin hu ħabib?"

"non ti capisco mi 'spiace!"

Imma kif hawn kulħadd bit-taljan jitkellem? imbagħad nara karozza max-xatt bin-namberplejt ta' Pozzallo.....

erġjat għaxxaqtha!!!!

Il-Piżella

2005-03-17T00:53:00.000-08:00

tal-piżella għidtielkom l-aħwa?
le?
mela waħda ta' malajr għax il-mara tistennieni......

ħatni jaħdem l-isptar u mhux darba w tnejn jiġi d-dar b'xi waħda tinkiteb. M'ilux ġimgħa kien qed jirrakontali dwar dad-daqsxejn ta' tifel daħħluh l-isptar għax kien qed ibati minn uġigħ ta' ras ġej u sejjer u ma jistax jieħu nifs sew. Ukoll, ommu w missieru kienu ilhom ftit issa jxommu riħa stramba fuq dat-tifel. Dritt l-isptar u t-tabib beda jinvistah. It-tabib ukoll xammha dik ir-riħa fuq it-tifel, iżda ma sablu xejn ta' barra mis-soltu.

Meta qal lit-tifel jieħu nifs minn imnieħru madankollu, deher li t-tifel ma setax jiġbed sewwa minn manħar minnhom. Għalhekk it-tabib dlonk meddu u xegħel it-torċ fuq imnieħru....u kif ħares 'il ġewwa bilkemm ma bediex irodd is-slaleb. Qam u bir-rogħda mar iġib pinzetta. Iżda kif beda jġebbed fuq dil-ħaġa bajda qisha għerq, it-tifel beda jwerżaq u jixher bl-uġigħ.

Kellhom iraqqduh bl-oppju. Meta operawh sabu sewwa sew x'kienet il-biċċa. Piżella żgħira, li għal xi raġuni t-tifel kien daħħal fi mnieħru. Dil-piżella, bis-sħana ta' ġisem it-tifel u l-umdita' ta' mnieħru ma damitx ma nibtet u firxet l-egħruq fil-kanali tan-nifs - u jkolli ngħid ħbieb li bdiet tiela' għal moħħu.....għalhekk l-uġigħ ta' ras......

Ħallejtkhom ħbieb - bonswa!

(ta' min wieħed jgħid li leġġenda urbana pjuttost mifruxa - fil-fatt jidhirli li rajtha f'xi film - tinvolvi l-istess prinċipju, iżda bil-kokroċ. Kokroċ omm tbid f'widnejn xi ħadd - u jibda ma jorqodx bit-tħaxwix li jisma' ġo waħda minn widnejh......tgħid veru?)

Il-Qarnita

2005-03-15T09:11:00.000-08:00

U tal-qarnita għidtielkom?

Mela darba meta nżilt għall-qarnit rnexxieli ntella' waħda l-ġmiel tagħha, tafux. Qed ngħidilkom, kien fiha 5 kilo żgur. U batejt biex tellajtha ta......ehhh fejn tafu kemm issarajna hemm taħt. Imma fl-aħħar irnexxieli.

Ħadtha d-dar u l-mara bilkemm riedet temmen kemm kienet kbira dik il-mniegħel qarnita. Ma riditx tersaq lejha għax kienet għadha taqbadlek m'idek jekk tmissha. Għalhekk tfajtha dritt ġo borma u qiegħdtha fuq in-nar.

Mort inċekċek xi ħaġa fil-garaxx għax il-qarnita ddum biex issir. Meta rġajt lura fil-kċina l-kuker kien mitfi, u staqsejt il-mara jekk kinitx tfietu hi.

leeeee qaltli - jien mhux fuq ngħaddi l-ħwejjeġ kont? Għalhekk erġajt xegħelt il-gass u qgħadt nara t-televixin.

Ma temmnux kif inħsadt meta nisma l-għatu tal-borma jaqa' ma' l-art. U l-isbaħ waħda ħbieb tiegħi....naħseb li l-qarnita ddejqet bis-sħana għax ħarġet id daqshiex mill-borma u għalqet il-gass....

It-Termos

2005-03-15T04:13:00.000-08:00

U tat-termos smajtuha?

Mela darba ninżel nogħdos għall-qarnit - tafu kemm inħobbu l-baħar - u wara li domt indur u ngħarrex fil-blat u ma sibt xejn nara din il-ġebla tawwalija li ġibditli l-attenzjoni. Għodost sa ħdejha u ndunajt li kien hemm qisha ġebla oħra mdaħħla f'naħa minnhom. Qalbi bdiet tħabbat sitta sitta, għax indunajt li sibt xi ħaġa antika....

Tellajtha l-art, u hemm fuq il-blat għaddieli bħal ħsieb minn rasi. Għidt bejni u bejn ruħi....dan qisu termos. U jiena u ndawru f'idejja biex narah sewwa lmaħt salib żgħir tal-kavallieri mnaqqax fil-ġebel. Mela veru antik, għidt!!!

Imma tgħid veru termos?

Għalhekk qlajt il-ħaġra ta' fuq u nara bħal likwidu kannella ġewwa. Riħa ta' kafe'!!! Ħadt belgħa minnu......u ma temmnunix ħbieb tiegħi.....................kien għadu sħun!!!!!!!!!

Il-Ġabra

2005-03-15T04:02:00.000-08:00

Madwar sitt jew seba' rakkonti ser jiftħu dan il-blogg. Ta' min wieħed jgħid li dawn l-istejjer smajthom mingħand tliet sorsi differenti.

Tnejn minnhom kienu jaħdmu f'żewġ fabbriki viċin xulxin, l-Imrieħel (it-tnejn qaluli li min kien jirrakkuntahom kien jaħdem magħhom u qal li ġraw lilu, iżda din ma tantx tinżilli.....kif jgħid JRZ - "ħadd ma jaf....!!!").

It-tielet sors huwa ħabib kbir tiegħi, li qalli li kien hemm dan il-karattru (li ismu ntesa) li kien jirrakkonta dawn l-istejjer Tigne', meta kien jintafa' ma dan il-grupp tfal jilgħabu.

Mela nibdew.......

Andrew

Merħba għeżież qarrejja

2005-03-14T10:04:00.000-08:00

Is-sliem għalikom ħbieb. Blogg żgħir ta' rakkonti qosra. Tat-tip li wieħed jisma' f'xi każin jew ħanut tat-te - rakkonti ta' avvenimenti li jitwemmnu biss b'daqsxejn diffikulta' - li ma kienx għal fatt li ġraw lil xi ħadd li nafuh (jew li jafu xi ħadd li nafuh); (jew li jiġi minn xi ħadd li kien qed jirrakkonta l-istorja ta' dan it-tali)....

Nittama li ma ndumx ma nibda nsib ftit ħin kuljum (jew għallinqas darba f'ġimgħa) biex naqsam magħkom dak li sibt u dak li smajt. Nitlobkom tibagħtuli stejjer ta' dan it-tip - ikunu x'ikunu - jitwemmnu jew le.

Saħħiet għalissa,

Andrew